Samarqand davlat chet tillar instituti O’zbekiston Respublikasi Prezidentining 1994 yil 8 noyabrdagi Farmoni bilan tashkil etilgan. Bugungi kunda institut oliy va o’rta maxsus va  xalq ta’limi sohasiga hamda turizm infratuzilmasiga yuqori malakali xorijiy filologiya mutaxassislari, shuningdek tarjimonlar tayyorlashning yirik markazlaridan biriga aylandi.

Yurtimizda dunyoni yangicha idrok etadigan, haq-huquqi uchun kurashadigan, o’z taqdirini xalqi, Vatani taqdiri bilan bir deb bilib, faoliyat ko’rsatayotgan yangi avlod shakllanmoqda. Ular ham ajdodlar ma’naviy merosini, umumbashariy qadriyat va kashfiyotlarni barobar o’zlashtirmoqdalar. Yuragida milliy iftixor tuyg’usi, Vatan muhabbati jo’sh urgan bilimdon, dono, tadbirkor insonlar har bir mamlakatning salohiyati, kelajagini belgilaydigan buyuk kuchdir.

Jamiyatda iqtidorli, yetuk, xorij tillarini mukammal biladigan yosh kadrlar qancha ko’p bo’lsa, taraqqiyot ham shunchalik yuqori bo’ladi va, ayni vaqtda, yurt osoyishtaligi, siyosiy iqtisodiy barqarorlik kafolati yuzaga keladi.

Shuning uchun ham mustaqillikning ilk yillaridanoq O’zbekistonda Kadrlar tayyorlash milliy dasturi qabul qilinib, unda belgilab berilgan vazifalar izchil amalga oshirilmoqda.

Aslida salohiyatli mutaxassis kadrlar - O’zbekistonning ertangi kunini, millat kelajagini belgilaydi. Shu bois zamon talablariga javob beradigan yuksak madaniyatli, bilimdon yoshlarni tarbiyalash davlatimiz siyosatining ustuvor yo’nalishiga aylandi.

Institutda 4 fakultet, 19 kafedra, 14 til va madaniyat markazlari, malaka oshirish va qayta tayyorlash fakulteti, mintaqaviy til o’rgatish markazi, axborot – resurs markazi mavjud.

Institutda 3 ta  yo’nalishda bakalavriatura, 2 mutaxassislik bo’yicha magistratura, 2 ixtisoslik bo’yicha aspirantura faoliyat ko’rsatmoqda. 350 nafar talabaga mo’ljallangan zamonaviy talabalar turar joyi, 250 o’rinli oshxona mavjud. Bakalavriat bosqichida bugungi kunda ingliz tili, nemis tili, fransuz tili, italyan tili, ispan tili, arab tili, yapon tili, koryes tili, xitoy tili va tarjimonlik mutaxassisliklari bo’yicha kadrlar tayyorlanmoqda.

Joriy o’quv yilida institutda bakalavriat bosqichida 1932 nafar, magistratura bosqichida 129 talaba, 14 nafar aspirant tahsil olmoqda. Ilmi toliblarga fan sirlarini o’rgatish, ta’lim jarayonini faol olib borish uchun ilmiy salohiyat mavjud. Hozirda 225 nafar professor-o’qituvchilar, shundan 13 nafar fan doktorlari, professorlar, 58 nafar fan nomzodlari, dosentlar, 154 nafar o’qituvchi mehnat qilmoqda. Shuningdek, institutimizda 15 ta xorijlik mutaxassis faoliyat ko’rsatmoqda.

Ta’lim jarayoniga axborot-kommunikatsiya  texnologiyalarini tadbiq etish borasida instit moddiy-texnik bazasi boyitib borilmoqda. Jumladan 300 dan ortiq zamonaviy kompyuterlar, 3 ta  lingafon sinfi, 8 ta kompyuter xonasi, 2 ta elektron doskali ma’ruzalar xonasi, innovatsion texnologiyalar asosida dars o’tishga moslashgan 20 ortiq auditoriyalar mavjud.

Institutda xorijiy davlatlar bilan hamkorlik aloqalari natijasida fransuz, nemis, koreys, turk, arab, yapon, italyan, fors, rus tili va madaniyati kabi markazlar faoliyat ko’rsatmoqda.

Shuningdek, institutda Murabbiylar va ustozlar, Vasiylar kengashlari faoliyat yuritmoqda. Institutda mamlakatimizning ko’plab chekka qishloqlaridan kelib, saboq olayotgan yuksak salohiyatli, iqtidorli talabalar ko’p. Bunday umidli yoshlarni xorijdagi nufuzli oliygohlarda o’qitish va ularga har tomonlama chuqur ta’lim berish borasida xayrli ishlar amalga oshirilmoqda.

Institutda «Kadrlar tayyorlash milliy dasturi» talablariga mos ravishda tuzilgan tashkiliy, ma’naviy, ma’rifiy, o’quv-uslubiy, ilmiy, iqtisodiy va xalqaro aloqalar sohasidagi rivojlantirishni ta’minlashga qaratilgan istiqbol rejasi mavjud.