O’zbekiston Respublikasi Prezidentining 2006 yil 20 iyundagi “Respublika aholisini axborot-kutubxona bilan ta’minlashni tashkil etish to’g’risida”gi PQ-381 sonli Qarori hamda vazirlikning 2006 yil 29 dekabrdagi “Axborot-resurs markazlari faoliyatini tashkil etish to’g’risida”gi 295-sonli buyrug’iga binoan sobiq ilmiy kutubxona bazasida tashkil qilingan. Institut axborot-resurs markazida quyidagi bo’limlar mavjud:

• Adabiyotlarni qabul qilish, butlash va kataloglashtirish bo’limi;
• Axborot xizmati ko’rsatish va marketing bo’limi;
• Elektron axborot resurslari va adabiyotlarni saqlash bo’limi.

Bu bo’limlarga bazaviy ma’lumotga ega bo’lgan xodimlar tanlov asosida ishga qabul qilingan.

Bugungi kunda axborot-resurs markazining foydalanuvchilari soni 5924 kishi, ulardan 2206 nafari talabalar, 364 nafari professor-o’qituvchilar, qolgan 3354 nafari hududiy foydalanuvchilar.

ARM foydalanuvchilarining talabnomalari asosida bibliografik ma’lumotlarni topish, zarur ma’lumotlarni foydalanuvchi istagiga ko’ra elektron va yozma variantlarda taqdim etish “Axborot xizmati ko’rsatish va marketing bo’limi” tomonidan amalga oshiriladi. Bu talabnomalarni tez va sifatli bajarish uchun bo’limga skanerlar, printerlar, kompyuterlar, nusxa ko’chirish moslamalari kabi axborot texnologiyalarining zamonaviy turlari ajratilgan.

Axborot va yangiliklarni foydalanuvchilar ehtiyojlari asosida shakllantirish va tarqatishga qaratilgan “Elektron axborot-resurslari va adabiyotlarni saqlash bo’limi” foydalanuvchilarga xizmat ko’rsatadi. ARM o’quv zallari va virtual kutubxonalaridagi kompyuterlar institut lokal tarmog’iga hamda respublika korporativ tarmog’iga ulangan bo’lib, bir vaqtning o’zida 224 nafar foydalanuvchiga xizmat ko’rsata oladi. Bo’limda axborot resurslaridan erkin foydalanish, kitobxonlarni qiziqtirgan ma’lumotlarni “Internet-Ziyonet”dan olish yo’lga qo’yilgan.

ARM faoliyatini tashkil etishning zamonaviy shakli bo’lgan “Axborot texnologiyalari bo’limi”da axborot-kommunikasiya vositalari bilan ishlash ko’nikmasi va malakasiga ega bo’lgan, multimedia vositalari yordamida axborotlarni shakllanti-rish tajribasiga ega xodimlar faoliyat olib bormoqda. Bo’limda foydalanuvchilarning talab va ehtiyojlari asosida axborot resurslariga qayta ishlov berilib, turli tarmoqlar yordamida shakllantiriladi.

“Kitoblarni qabul qilish, butlash va kataloglashtirish bo’limi” markaz fondiga kelib tushayotgan va undan chiqib ketayotgan adabiyotlar hamda hujjatlarning umumiy jamlama va yakka tartibdagi hisobini yuritish, mavjud bo’linmalar jami fondining aniq hisobini amalga oshirishni ta’minlaydi. Bo’limda axborotlarni ma’lumotlar bazasida saqlanishning, fondni kutubxona so’rovi asosida ta’minlash va Respublikadagi boshqa viloyat hamda oliy o’quv yurtlaridagi ARM, AKM lar bilan muvofiqlashtirilgan holda keng aholi ommasi va talaba-yoshlarning kitobxonlik so’roviga ko’ra xizmat ko’rsatish yo’lga qo’yilgan.

Bugungi kunda institut ARMda 263909 saqlash birligi, shu jumladan virtual kutubxonada 2890 nomdagi 50,2Gb hajmdagi axborotlar yig’ilgan. ARMda axborot resurslari o’zbek, rus, ingliz, nemis, fransuz, italyan, ispan, koreys, yapon, arab, tojik va shu kabi 20 dan ortiq tillarda jamlangan. Davlat tilidagi adabiyotlar kolleksiyasi tarkib jihatdan eng katta miqdorni egallaydi. Shuningdek, rus tilidagi adabiyotlar fondi ham boy bo’lib, ular ijtimoiy-siyosiy, gumanitar, tabiiy-ilmiy va o’quv-texnik lug’atlari hamda chet tillarini o’rganish uchun mo’ljallangan o’quv qo’llanmalaridan iborat. Ilmiy mazmundagi adabiyotlar fondda asosiy va muhim o’rin egallaydi.

Hozirgi paytda talabalar turar joyida, ingliz filologiyasi, roman-german filologiyasi fakultetlarida ARMning tarmog’lari tashkil etilib, ular sohaga doir ilmiy, badiiy va o’quv adabiyotlari, ma’lumot-bibliografik material-lar bilan ta’minlangan.

Institut ARMda gazeta va jurnallarning oxirgi besh yillikdagi nashrlari to’liq saqlanmoqda. ARM ish faoliyatini yanada takomillashtirish maqsadida zamonaviy texnologiyalardan foydalanishga alohida e’tibor qaratilgan.

ARM ning 3 ta tarmog’i mavjud:

• Samarqand  sh., Buyuk Ipak yo’li, 65-uyda joylashgan 1-tarmoq;
• Samarqand tumani, Ravonak qo’rg’onidagi 2-tarmoq;
• Urgut tumani, O’ramas qishlog’ida joylashgan 3-tarmoq.

ARM tarmoqlari o’zi joylashgan hudud aholisiga, maktabgacha ta’lim muassasalariga, maktab o’quvchilari hamda o’qituvchilariga, lisey-kollejlar hamda oliy o’quv yurtlari, shu jumladan institut talabalariga xizmat ko’rsatmoqda.

Ma’lumotlar uchun:

Manzil: Samarqand shahri, Bo’stonsaroy-93, SamDChTI bosh binosi.

Telefon:  +99866 231 13 42

Ye-mail: SamDChTIARM1@rambler.ru